Wat de boer niet kent …..
Een joar of wat ‘eleen kwam ik een breur en zuster uut Lier’n teg’n die mit een foto ankwamm’n. Ze hadd’n zelf ok al een hoop nam’n in ‘evult ma wiss’n niet zo goed woar dit pláátjen ‘emaak was. Haha dat was lachen ik zagge metene woar dat prentjen emaak was en ja de meeste namen wis ik ok wel op te nuumen. ‘t Tafereel is een schoolklasse vol mit 16 mannen, al of niet mit een schört veur bie een koakles in Lieren en de foto mot rond 1963 ‘emaak wèèn.
Goed ik zal ’t effen uutleggen. In de joar’n vijftig, veurige eeuw, kwam d’r in Lieren, noas de kärke, een huushoudschole, “Streekhuishoudschool De Beekvallei”. In disse veural agrarische streek was de schole een welkomme anvulling en trok deerns uut de därpen ten zuiden van Apeldoorne.
De schole vervullen ok een behoefte onder de volwassen bevolking deur in de oavend uren nàài en koak lessen te geven. Toen d’r een ankondiging kwam dat d’r koaklessen van start ging’n veur mannen hadden zich binnen de körtste keren genog kandidaten an’emeld. Op de foto is te zien dat de mannen zich op’esteld heb achter de fornuuzen en aanrech’n, en een lerares, mit hagelwitte schört, as enige vrouw tussen al die keerls.
Buuten de lessen wödden in Lieren en ömstreken dagen doarnoa disse koaklessen nog is uutvoerig noabesproken mit iederene die ’t ma heuren wol. Vanzelf wödden die verhalen dan nog is extra smeuïg emaak en an’edik. Onder de keerls bevonnen zich ok verschillende vriegezellen. Een van hun was Jan de Knoes (Jochems) die sam’n mit zien breur Albert bie de bèke an de Lierderstroate wonen. Een klein männetjen die zo zien eigen opvattingen had oaver èten koaken. Bakk’n in margarine was in zien belèving rommel wa’j nog niet an de värkens gaven. Onder zien kiel had hee in papier ‘ewikkeld een stuk reuzel en as de juffrouw effen niet opletten deeje vlug een brokke in de panne, hee wenken Reinder Ruutpolle (de Groot), ok een vriegezel, en schoof ‘m stiekem onder toafel een stuk reuzel toe töt grote hilariteit van de andere keerls.
Op de foto vlnr: Frits de Groot, Jan Kraai, ?, Henk de Bruin, ?, ?, ?, Jan Jochems (bienaam Jan de Knoes), Gerrit vd Kamp, Teunis Hartgers (bienaam Tunnes de post, hij was postbode), achter Teunis Ab of Karel vd Kamp, lange man achter Jan Jacobsen, man voor hem Gerrit Plante (kassier/directeur Raiffeisenbank Lieren), de juffrouw die les gaf, dan twee mannen die nauwelijks zichtbaar bint, woarvan vermoedelijk een van de twee Reinder de Groot is en helemoaole rechts Anton Hiddink.
Wie de ontbrènende namen wit mag reager’n, öm zo ’t hele plààten compleet te krieg’n.
Willy Rouwenhorst-Hartgers.
