Hoe de dreum van ’t eerste kievitsei uuteen spatt’n
Mensen die vaker verhaaltjes van mien elèz’n heb weet dat ik bie verhaaltjes van vrogger, toen’k nog een klein deerntjen was, mien tweede naam Hanna gebruuke. De naam van mien vriendinnetjen Evelien is wel ’t zelfde eblev’n.
Hier een woar gebeur verhaaltjen uut de joar’n vieftig toen ’t vind’n van ’t eerste kievitsei nog een traditie was.
Sam’n mit vriendinnetjen Evelien goat de beie deerntjes uut Lier’n op ontdekkingstoch. Eigelijk moch Hanna van eur moeder niet bie de bèke speul’n ma Evelien wis zukke spannende pleksies en pààdjes dat ze zonder ärg toch bie de bèke terechte kwam’n. Vanaf de Möllevoart bie de Tippe ging’n ze de weie van Marten van Zee in, krop’n een eindjen vädderop onder ’t puntdroad bie de weie van Wim Berends deur en kwam’n zo bie ’t bruggetjen oaver de bèke, --nou ja bruggetjen? ’t war’n meer een paar balke’n--.
In de andere weie bie een sloot ekomm’n dej’n ze hun beste de oaverkante dreuge te bereik’n en ok niet te vergèt’n, zonder kleerscheur’n onder ’t puntdroad deur, want ….o gutt gutte as moeder toch is wis dat Hanna al värre oaver de bèke was….!
Plots was doar inens de Reuderbèke! Een aftakking van de Ouwe bèke vanaf de Lierderstroate dwärs tuss’n de weiens deur öm een ende vädderop weer in de Ouwe bèke uut te komm’n an de Möllevoart, net iets veurbie de Kalverweie. Die Reuderbèke was nog wel een uutdaging want hee was bréjer as de gewone slot’n en ok iets dieper. Ma verdult ze kwam’n toch zonder natte voet’n an de oaverkante. In de weiens was niet zovölle te zien zo vrog in ’t joar de meizuuntjes, botter en pinkster bloemen bluuien nog niet, zelfs de hondepoll'n zat'n nog niet in de knop en in maart liep’n de koene ok nog niet buut’n.
Eigelijk wiss’n beie deerntjes ok niet zo goed wat ze doar deej’n, enkel was ’t meer ömme de spannig en ’t avontuur en iets te doen wat niet moch. Ma doar inens begonn’n hun hätjes hädder te klopp’n, veur hun voet’n bie de klömpies in ’t gres zag’n ze inens een heel mooi nessien mit vier gespikkelde eitjes d’r in. Ze hadd’n metene deur dat ’t een kievitsnessien was en eff’n war’n ze stille en beduus van dat lieve mooie nessien. Dat d’r ok een schetter’nde en schrèw’nde moeder kievit öm hun hen vloog hadd’n ze ens niet deur. De deerntjes wiss’n wel zovölle dat dit een hele biezöndere vons was.
Op slag sloeg hun fantasie volledig op hol en ondanks dat ze in die tied nog gien tillevisie hadd’n en de radio ok niet zo vake anston, wiss’n ze wel dat ’t vinn’n van ’t eerste kievitsei een belangrieke gebeurtenis was. In gedach’n stonn’n ze al bie de burgemeester of de commissaris van de koneginne op de stoep, of…..zelfs bie de koneginne zelf!! O ja, ze wiss’n ’t zeker, mit een mooie nieuwe jurk an en een mooie strik in ’t hoar! Ze zoll’n in de krante komm’n te stoan en kreg’n een beloning. De opwinding was groot.
De wärme gespikkelde eitjes wödd’n veurzichtig in ’t kuultjen van hun rok eleg en zo ging ieder mit twee eitjes op huus an. Onder ’t prikkeldroad deur ging nog wel ma o jee, die slot’n war’n opnieuw een uutdaging, zeker noe ze hun röksies op moss’n houw’n. Ma ’t ging heel mooi en ze hoev’n nog ma ene sloot. ’t Drama was dan ok groot toen, hoe veurzichtig ze ok deej’n, de eitjes ’t niet ehaald heb. Eers sprong Hanna oaver de sloot ma bie ’t neerkom’n mos ze zo eur beste doen öm in èvenwich te bliev’n dat pardoes de kosbare eitjes brak’n bie ’t neerkom’n. Beteuterd kiek’nd noa die vieze drap in eur röksien oaverkwam op dat moment Evelien ’t zelfde. Niet alleene de eitjes ma ok hun dreum spatt’n uuteen.
Besmeurd van de smurrie en hier en doar een hoak in de kler’n kwam’n ze thuus woar zo goed en zo kwoad ’t hele verhaal d’r uut kwam en Hanna op mos biech’n woar ze ewes was. Noas dat ze moppers kreeg gaf moeder ok nog een prèke oaver dat ze nooit een nessien mit eitjes moch’n verstor’n en toen lèpel’n ze op woar de bei’e meisies ok al oaver edreump hadd’n toen ze op de knietjes bie dat lieve nessien in de weie lag’n. Nog gien wèke later ston d’r in de krante een foto van een volslag’n vremp iemand, argens uut ’t land, die de koneginne op Soestdijk ’t eerste kievitsei anbooi.
Willy Rouwenhorst-❤gers april 2022