Dit keer gau`w een bitjen dwalen in ons mooie Bikbärgen. Eers komme wie vanaf de Därpsstroate in ’t mooiste lààntjen van ’t därp, de Kärkallee. De eeuwenouwe bomen an weerskanten bepaalt ’t karakter van disse allee die in de zomermoand’n, juli en augustus, elleke donderdag oavend bont ekleurd is van de mensen die de Veluwse oavend märk bezuuk.
Vrouwluu mit knipmutse en bonte schöt en mann’n in boer’n kiel mit rooie zakdoek en pet loat ouwe ambachen herlèven. Een gouwen greep van de midd'nstand, die noe al sinds 1965 völle bezuukers telt. Bakker Jopie Dolman had veur disse geleg'nheid een nieuw baksel bedach, de 'Veluwse bol'. De bol was hoas niet an te slöpp'n en hef 'm uuteindelijk gien windei'r hef eleg.
’t Is de oplettende bezuuker vas wel op evall'n dat rech's ’t één noa laatste blauwe huusien verscholen achter de märk kröämpies en klimop weer helemoale is op eknap en d’r weer prachtig bie steet. Ooit wonen hier kuns schilder Jan Hendrik Persijn die zich veurnamelijk bezig hiel mit ’t schiler’n van landschapp'n, stillèvens en bloemen. In 't nieuwbouw buurtjen bie 't Hoogeland is d’r zelfs nog een stroate noa ‘m vernuump. Hee was lid van de Apeldoornse kuns kringe ‘De Kern’ en in ’t bekende Apeldoornse ‘Achterom’, was indertied nog een schilderie van ‘m te zien.
An de andere kante van de Kärkallee lig de pastorie tuin van de Protestante kärke mit doarachter de kärke zelf, ’t oudste gemeentelijk monument van Apeldoorne die een bezuuk meer dan wèèrd is.
Bikbärgen steet niet alleene bekend as vakantie därp ma òk verzörgings huuzen bint hier talriek anwezig. Eèn van die huuzen is ’t Zonnehuus die al heel wat hef betekend veur Bikbärgen en ömgeving. In de oorlogsjoaren was dit verpleeghuus òk een toevluchsoord veur evacuee’s uut Arnhem. Op 12 november 1944 zag hier Johnny van Doorn as evacuee baby ’t lèvenslich. Johnny ontwikkel’n zich töt een briljant dichter en verkondig'n zien teksen op een wonderlijke maniere.
As Johnny de Selfkicker brache zichzelf in duuzelingwekkend tempo in een extase van oerklank’n. D’r kwam een waterval van woorden oaver zien lippen die goandeweg naarns meer op leek. Woes gebarend en articule’nd raken hee in hoger sferen öm vervolgens in katzwijm te raken. Zo wödden Johnny regelmatig buuten wes’en van ’t podium edragen. Filmpies van zien optred'n bint nog wel te vind'n op YouTube. Hee is niet ouwer ewödden dan 44 joar.
Johnny was zien tied vär veuruut en zol hee hed'ntendage anno 2023 zo mee kunn'n doen an 't Songfestival in 't rietjen wild uutgedoste arties'n.
Willy Rouwenhorst-❤gers
