Dreum uut 2018
Wie dreump allemoale wel is en dan bint ’t vake van die druem’n die toch nooit uut komp. Al dreum’nd van ons ouwe Apeldoorne zo’k nog wel weer is de luch willen ruuken van toen d’r nog een koffie brander an de Heufstroate zat en wat roken die värs gebrande pinda’s toch altied lekker! Hmmmm en dan 's oav'nds uutgevouw'n krant'n op toafel en lekker pell'n.
De sfeer van een bult volk wat in en uut de winkels liep beheersen ’t stroatbeeld. Drukke koopoavenden veural rond sinterkloas en Kärs mit mooi versierde etalage’s en de gezellige winkel promenade op de kop van de Heufstroate.
An die tied terugge denkend zo’j oe noe in 2023 bie ’t zien van al die lèèg stoande winkels hoas in de ärm kniepen öm te kieken o’j noe niet dreump. De veurzitter van de VOA benoadrukken joar'n eleen in eur nieuwjoars toespraak “niet vernietigen mä vernieuwen”. Gelukkig wödt doar al häd an ewärk want achter verschillende strak afgespiekerde gevels komp weer mooie pareltjes teveurschien. Vaardige hande van wärkluu die ’t vak verstoat brenk de gevels weer in ouwe staat.
Laats sloeg mien de schrik ömme ’t hätte toen’k een foto van mien zuster krege van een kaal gestripte boerderieje in Lieren, woarvan de balken alleene nog ma oaverende stonnen. Mit völle geduld en vakmanschap is disse boerderieje herbouwd en terugge ebrach in de stoat zoasse ooit was. Een dreum van de bewoners is wärkelijkheid ewödden al mossen ze veuraf wel effen in hun ärm kniepen toen bleek dät d’r wel een kroewagen mit geld nodig was véur dät d’r ok ma éne dakpanne van 't dak was elich.
Op nog gien honderd meter vanaf disse boerderieje vin ie twee boer’n schuuren, die bienoa riepe veur de sloop, òk mit eigen middelen en zonder ene cent subsidie weer stoat te pronken in ouwe stoat. De argeloze veurbieganger hef ’t ens niet deur, zo onopvallend bint ze verbouwd.
Toen’k in mien kindertied nog op de Prinses Juliana schole an de Tullekensmolenweg zatte ston d’r an de oaverkante een bouwvallig huus woar gien eer meer an te behalen viel. Oaverwoekerd deur klimop en zo lek as een mändjen zag d’r toch nog iemand brood in öm “Huize Bloem” weer in ouwe ere te herstell’n. De stapel papierwärk, regels en veurschrifen heb òk disse dreum weerstoan. Een dreum woar wie allemoale van meug mee genieten op een mooi an’eleg terras onder ’t genot van een lekkere versnapering. Beste lèzers loa’w veural blieven dreumen want doar kan vas nog völle moois uut voart komm’n.
Willy Rouwenhorst-❤gers
