Op pad mit kleine Hanna uut Lier’n
(in 2013 is dit verhaal gepubliceerd in ‘t boekje “Ik zie het nog zo voor me” deel 7 van de Vereniging Oud Apeldoorn)
Öm ’t volgende verhaal op te schrieven heb ik mien verplaats in de tied woarin ik dit alles heb belèèf, dat was in de joaren vieftig van de twintigste eeuw vanaf da’k een joar of vijf was. As kind belèèf ie de dinger heel anders dan as volwassene en doaröm heb ik besloten mien te verplaatsen in die lèèftied. De gebeurtenissen heb ik etrach zo authentiek mögelijk op te schrieven. In ’t dagelijkse lèven wödt ik mit Willy anesproken ma in dit verhaal gebruuk ik mien tweede naam “Hanna”. 't Wereldjen van kleine Hanna speult zich af rond de boerderieje van de familie Hartgers op de punte Möllevoart, Möllenbärg. ’t Gezin besteet uut vader en moeder en acht kinder, zes jonges en twee deerntjes, Hanna is nummer vijf. De Möllevoart in Lieren löp in 't verlengde van de Tullekensmolenweg vanaf de kruusing mit de Lierderstroate in oostelijke richting. Een paarhonderd meter vädderop is d’r een afsplitsing noa rechts van de Möllenbärg. Op disse splitsing lig de “Tippe” een belangrieke ontmoetingsplekke in disse buurte woar middenop een grote keie lig. (noa een grondige stroat renovatie is disse tippe in 't noajoar van 2021 volledig verdwen'n) De Möllevoart löp vädder via de Schanse en bie de fabriek van Goudkuul maakte een boch noa links, in die boch slöt rechs 't weggetjen de Sloot af, veurbie de fabriek van Goudkuul passeer ie links de bèke mit 't waterrad en waterval en effen vädder slöt no rechs de Kalverweie af. De Möllevoart geet vädder öm vervolgens uut te kommen achter 't brugwachtershuus en bie cafe Ruijsch an 't kanaal. An de Möllevoart stoat ouwe Saksische boerderiejen van honderdvieftig töt tweehonderd joar oud.
Door onderstaande link aan te klikken vindt je het hele verhaal in pdf inclusief foto's.
Op stap mit kleine Hanna uut Lier'n.pdf