Spoar’n veur de olde dag
Willem Drees, die hield van mens’n
En wol hen graag ’n verzörgde olde dag toewens’n.
Dus ontwierp hé de AOW
En heel ’t land riep blie: HOEZEE
En zo wörd’n d’r ezörgd veur de ouw’n van daag’n
Veur mens’n uut alle bevolkings laag’n
Al was dat inkommen niet zo heel ärg groot
Ze hoefd’n niet meer te wärk’n tut an hun dood
De riek’n woll’n ’t doa niet mee doen
En spoard’n värder veur ’n anvull’nd pensioen
De fonds’n kreeg’n doadeur meer cent’n in de kas
En uutbetaal’n? Dat hoefde men veul later pas
Hee, dacht’n die fonds’n, dit mot ok veur de gewone man
Zodat die later ok wat ruumer rondkommen kan
Wiele regelt dat dan mit zien salaris
Hé zal d’r blie mee wean as e straks kloar is
En dus spoard’n de fonds’n die cent’n d’r bie
Veuruutzicht’n mooi en iederene blie
Pensioenfonds’n spoard’n en bulkt’n zo van ’t geld
Dat belaofd’n heel wat, iederene welgesteld
Mä nao joar’n bint ze zonder iets te zegg’n
Mit onze cent’n fanatiek beginn’n te belegg’n
En dat alles was helaas ’t begin
En de plus in de pot wörd’n ’n droevige min
Directeur’n en commissariss’n verzaakt’n hun plicht
Want op ons geld hield men geen zicht
De pot die raakt’n lèèg, ’t aoverschot slonk
Nao alle onderzoek’n denk ik dat ’t stonk
Niemand kreeg d’r ’n boete, niemand kreeg d’r straf
Van hun kapitaal ging gien centjen af
’n Beloning hier en ’n handdruk daar
Mä de pensioengerechtigde was toch de sigaar
Inlever’n Baby-boomers, iele bint ok mit zo veel
Dat jullie zovulle betaald heb is niet essentieel
En ok de AOW lèèftiet is veul te laag
Al die 65-plussers wöd nog es ’n grote plaag
Dus pensioenen verlaagd, pensioenslèèftied verhoogd
Want alle opgespoarde pott’n bint bienao op edroogd
En wat d’r an geld is dat geet nao Europa
Dus pakt oe rollator en wärk’n mä opa
Kom op regering, heb gie härte van steen
Kiek veur de verandering es um oe heen
De olde arbeiders mankeert vake wat
Kwaol’n, deur ’t härde wärk wat ze heb ehad
Doabie, wie wil die arbeider noe nog hebb’n
De man die zien kracht’n mit de joar’n zag wegebb’n?
Mot ze noe wärkelijk nog solliciteer’n
Van de in pluche zitt’nde dames en heer’n?
Willem Drees kik noe mä droef op ons neer, ’t was toch gien spel?
Mä mit dat belegg’n leek ’t dat wel
Zien menslievende plan is, ’t had zo mä gekund,
De werkman op lèèftiet niet gegund.
