Freek Flodderbokse geet help’m mit dörs’n
Wie is Freek Flodderbokse? Freek is zo’n 20 jaor old en woont nog bie zien moe in huus en dat is mä goed ok, want anders zol ’t denk ik niet goed gaon mit Freek, hé is namelijk ’n bitjen, ja hoe za’k oe dat zegg’n, ’n bitjen simpel, ’n bitjen dom en ok is Freek ’n bitjen apart in zien doen en laot’n, gien nare vent heur, mä ok nog 's verrrrrrekte eig’nwies. Hé wil nao niemand luuster’n, hé geet zien eig’n gank. ’t Interresseert um ok niet wat of iederene van um denk of zeg. Freek is en blif Freek. En woa die naam flodderbokse vandan kump?, dat za’k oe ok vertell’n. Freek wil niet anders draag’n dan boks’n mit van die hele wieje piep’m weet ie wel, gien model in de bokse, niks, allene mä rech toe rech an, de piep’m bint van onder’n net zo wied en breed as dat ze van baov’m bint en de piep’m mag um ok niet op de klomp’m hang’n, dat wil e ok niet. Hoewel zien moe graag wil datte is an de nieje mode meedut, hé dut ’t niet.
En zodoende blif e ’n flodderbokse en in de buurte heet’n Freek dan ok Flodderbokse. Mä wärk’n dat e kan. As e wil, dan wärkt e as de best’n en hard ok heur, mä as e niet wil dan krie’j um ok niet an de gang.
In de buurte meug ze Freek allemaole graag, hé is niks te broerd um iemand te help’m. ’t Dommere wärk dan wel te verstaon en meewärk’n kan e goed, mä laot um niks allene doen, doa kump niks van terechte.
Vandage was de buurte bie Gaart uut eneudigd um te komm’ dörs’n, alle mansluu uut de buurte komp dan bie mekare um te help’n, zo geet dat altied aover en weer, dat heur’n vrogger zo.
De dörskaste kump dan al vrog ’t ärf op riej’n, alles mot dan waterpas staon en de maschiene mot goed wöd’n af esteld. Dan kump de tractor d’r veur en d’r wöd ’n breeje leer’n riem aover de poelie hèn egooid, die de dörskaste an mot driev’m, de kearls bint al ’n höt bezig veur dat d’n eers’n bos rogge in de kaste egooid kan wöd’n.
Baov’n in de strobarg staot twee man, op de dörskaste twee, tweeje achter de kaste um ’t stro weer op te vang’n en dan nog
ene die ’t zaod opvankt en zörgt dat d’r genog touw op de kloss’n zit um de gärv’m te bind'n.
En dan mot d’r nog ’n man of viere ’t stro baov’m in de boerderieje zien te krieg’n.
’t Is slim wärk, ze zweit zich allemaole ’n ongeluk. As ’t hele spul goed drèj’t dan mot d’r ech ewärkt wöd’n, dat za’k oe wel vertell’n.
En dan he’j an Freek zo’n kearl hè, wärk’n dat e dan dut, niemand dut um dat dan nao en dan ok nog niet ’t lichtste wärk, nee heur, hé mot dan altied de gärv’m opstèk’n, mä hé dut d’r altied tweeje of soms wel drieje tegelieke an de gafel. Veur de kearls op de dörskaste is ’t flink anpoot’n um Freek bie te holl’n, Freek hölt de gank d’r wel in. In de buurte ziet ze um dan ok graag as e kump help’m.
Dat ’t slim wärk is dat he’k oe al ezeg, en stoev’m dat ’t doa dan dut, zo vreselijk härd, de kearls heb in ’n mum van tied ’n dôrs as ’n peerd, ’t is dan ok al bietieds koffiedrink’n.
Sloot’n koffie en stapels dubbele boterhamm’ wöd d’r dan deur de dörskearls in körte tied weg ewärkt. De kiender in de buurte bint dan ok altied van de partij, want dat is ’n lekkernij die’j anders nooit kriegt: ’n dubbele witte boterham mit boterhamwos of mit käse. Sjonge, jonge, doa wo’j as kiend toch wel ’n jaor lank iedere dag eerpels veur schell’n.
As de koffie en ‘t brood op is gaot de kearls weer an ’t wärk.
De strobarg wöd lèger en lèger tutdat ’t moment kump dat ’t spann’d begint te wöd’n, want zit d’r noe wel of niet ’n ulk onder de bärg. ’n Ulk is ongeveer ’t zelfde as ’n bunzing, dat is ’n roofdiertjen die ’t kipp’m hok niet ongemuuid löt, ie kunt dan altied kapotte eierschaal’n in ’t hok vinn’, dooie knientjes in ’t knienn’hok, dooie kuuk’ns en vogels, mä as zo’n beessien in ’t nauw kump dat wöd e gevaorlijk want hé vlög zien belager altied drek nao de strotte, wie of dat dan ok is. Zelfs de dörskearls holt d’r ech rekening mit dat d’r ene onder de laatste laoge gärv’m vandan kan komm’ spring’n, ze staot dan allemaole klaor um d’n ulk aan de gafel te stèk’n.
Zo ok disse keer, de laatste laoge is bienao op en doa springt ’n ulk onder de bärg vandan, de kearls slaot en haopt um zo dood te kunn’ slaon of an de gafel te kunn’ stèk’n, ’t diertjen is al danig gewond en bloei’t an alle kant’n.
Freek dut ok mee, mä hé strukelt en völt languut achteraover, en dan inens zut d’n ulk ’n hölletjen en doa vlög e in. Mä laot dit noe de broekspiepe van de flodderbokse wean.
Freek gilt en schreeuwt ’t uut en völt dan inens flauw mit in zien flodderbokse d’n ulk.
Zien bokse begint zo rond zien kruus behaorlijk rood deur te kleur’n. Freek bloeit, één van de dörskearls bedenk zich niks, grip zien knipmes en snit ’t strotouw, die Freek as broeksriem gebruukt, deur en trekt Freek de broek van ’t gat, wat kan zo’n ulk doa wel niet anricht’n? Doa lig dan Freek in zien blote niks tuss’n de gärv’m.
Jongeheer P. Ielemans zit helemaole onder ’t bloed en hef de kop aover de petroon’n tasse ligg’n en d’n ulk, die inmiddels is aoverleej’n, lig d’r naost. Eén van de dörskearls grip ’n emmer mit water en gooit die d’r aover hèn en Freek wöd weer wakker, vlög aoverende en grip ’n jutezak veur ’t zaod en knupt die gauw umme, noe löp e in ieder geval niet meer zo te koop mit zien hele hebb’m en holl’n. Achteraf was ’t gelukkig allemaole bloed van d’n ulk en Freek is d’r mit ’n paar schramm’ van af ekomm’.
Sindsdien hef Freek in ieder geval mit ’t dörs’n ’n bokse mit nauwe piep’n an en zo lange de buurluu bie mekare komp um te dörs’n kump Freek mit zien ulk altied weer te spraoke.
Mä de naam Flodderbokse hef e eholl’n zolange ik um heb ekend.
