AOW
Ik heb vieftig joar van alles mott’n doen
En wärk’n mos ik as ’n peerd
Mä noe he’k toch ’n leuk pensioen
Umdat mien vrogger van spoar’n is eleerd
Wie woont noe in ’n aardig huus
Mien veurtuin liekt een plantsoen
Ik dache noe doe’k ’s lekker niks meer, ik blieve lekker thuus
Umda’k noe niks meer hoef te doen
Ik wärke wel deur zei mien vrouw lillijk
Ik wödde nooit gepensioneerd
Ik vin’t niet meer as billijk
Dat ie mien ok is assisteert
Ik hou van netjes en glad
En hou mien huusien in fatsoen
Goed zei ik ik helpe oe wel wat
Umda’k toch niks meer heb te doen
Mä ’s maarns nao ’t ankleej’n
mo’k al beginn’ as stofzuuger machinist
Ik zuuge van baov’n nao beneej’n
Gien huuksien wöd deur mien emist
En noe kan’k ok al koffiezett’n
Wass’n, striek’n en ik boen
Ik dekke de taofel, make mit alles körte mett’n
Umda’k toch niks meer heb te doen
Ok verbouw ik achter ’t huus noe wat slaot
Die tuin mot wörd’n uut ebuit
Dat ku’j dan zelf wel zei mien eega kwaod
Dat schèèlt ons dan ’n mooie duit
En noe stao’k hier dan te spitt’n
ik paote andievie, biet’n en meloen
‘k Hebbe de bloar’n in mien hand’n zitt’n
Umda’k toch niks meer heb te doen
Mien vrouw hef ok nog twee poez’n
Die bint zo lief zeg ze en zo mak
Ze geeft köpkes en ze lust ok moez’n
En ikke? Ik zitte mit de katt’nbak
En die kreng’n heb merakels veul kuur’n
Want zek ze dat lig dan an’t seizoen
Dan kump de kater van de buur’n
Umdat die ok niks hef te doen
Is mien kleinzoon soms wat luustermoe
En dutte niks as kattekwaod?
Dan zeg mien dochter: gao ie mä nao opa toe
Die wit toch mit zien tied gien raod
Zij en oma gaot dan winkel’n
En drink koffie mit ’n taartjen toe
Ik speule indiaantjen en ik bin an ‘t hinkel’n
Umdat ik toch niks meer heb te doen
Mien vrouw geet vake koffiedrink’n bie ‘n vriendin
En vermaakt zich doa dan opperbest
En as e dan weerkump hef ze an èt’n gien zin
En geet dan nao baov’m en kröp in ’n opgemaakt nest
Eigenlijk bin ik mä ’n doetjen
Mä wat ku’j doa noe an doen?
Oma hef mien bie hand’n en voet’n
Umda’k toch niks meer heb te doen
Ik bin dienstmeid, ik bin tuinman,
Ik dweile, poetse en schrob
En zij dut net of zij ’t niet meer kan
En op mien wärk? Doa hölt ze toezicht op
Ik loope te zweit’n en stao in de panne te roer’n
Mit ’n kop as ’n bezwete kampioen
Raak ik verduld nog aover mien toer’n
Umda’k nooit meer wat heb te doen